Marrëveshja u ratifikua por detyrimet s’u përmbushën.
E shpërndarja e Kuvendit rrezikon t’ia humbë Kosovës dhjetëra miliona euro, të parapara nga plani i rritjes i Bashkimit Evropian.
Qasja në to ishte e kufizuar, e Kosova vlerësohet se u vonua.
“Rrezikojmë që të humbim 68.8 milionë euro si mungesë e mosimplementimit të hapave reformues të cilët kanë qenë të planifikuar deri në qershor 2025 dhe kanë parë periudhën ‘grace’ deri në qershor të këtij viti”, ka thënë Arifi.
Përmbushja e këtyre reformave tash brenda 2 muajve të mbetur, konsiderohet e pamundur, meqë s’mund të bëhen pa Kuvend funksional apo me Qeveri në detyrë.
“Në mesin e këtyre hapave reformues kemi 4 procese legjislative të cilat kërkojnë edhe votimin në Kuvend, në anën tjetër kemi edhe strategji p.sh ajo kundër krimit të organizuar e cila njësoj kërkon miratim në Qeveri”, u shpreh tutje Arifi.
Derisa Kosova po humb fonde për shkak të krizës politike, sipas ekonomistit Safet Gërxhaliu, vendet e rajonit po përfitojmë para të majme nga marrëveshje ndërkombëtare.
“Dje në Shqipëri është nënshkruar marrëveshje e madhe që ka të bëjë me gazin amerikan. Në Kroaci është nënshkruar projekti më i madh në partneritet me SHBA-në mbi 50 miliardë euro për inoavacion dhe inteligjencë artificiale. Po këtë ditë, në Serbi është nënshkruar një marrëveshje për inovacion dhe bartjen e ekspertizës zvicerane në Serbi”, ka thënë Gërxhaliu.
Nga pako prej 882 milionësh që BE-ja ndau për Kosovën, deri tash janë marrë vetëm 7 për qind apo 61 milionë euro, si pjesë e parafinancimit.
E parat e humbura, sipas marrëveshjes i jepen shteteve tjera të Ballkanit Perëndimor që përmbushin reformat.
