Ora dhe syzet u sollën në Prishtinë.
Por, 29 vjet më parë, ato i përkisnin një mësuesit në Srebrenicë të Bosnje dhe Hercegovinës.
Ky i fundit ishte vetëm njëri nga dhjetëra mijëra boshnjakët myslimanë, që në korrikun e vitit 1995, u mblodhën në Srebrenicë.
Më 11 korrik, mësuesi boshnjak, bashkë me 8 mijë e 371 myslimanë të tjerë, u vranë nga Ushtria e Republikës Serbe në krye me Ratko Mlladiq.
E në përvjetorin e 29 të kësaj masakre, dy artefakte të viktimave të këtij gjenocidi serb, u zbuluan në Prishtinë.
“Këtu çka po shihni sot, po ekspozohen artefaktet e një mësuesi, i cili nuk kishte faj, ai është dashur të vazhdonte të jepte mësim në Srebrenicë, por që sot duhet ta kujtojmë vetëm përmes këtyre artefakteve”, tha përfaqësuesi i familjarëve të të vrarëve, Mensur Bektic.
Mensur Bektic, është edhe autori i simbolit të gjenocidit në Srebrenicë.
Ndërsa si përfaqësues i familjarë të viktimave të këtij gjenocidi, thotë se dhimbja për të vrarët, është ende e madhe.
“Nëse vini në Srebrenicë dhe rrini me nënat, gratë apo motrat e këtyre burrave të vrarë, krejt çfarë do të dëgjonit, është ofshama pikëllimi, por asnjëra nuk kërkon hakmarrje, nuk kërkojnë vrasjen e serbeve, por i edukojnë gjeneratat e ardhshme me tolerancë, të cilën e ka treguar edhe Kosova”, tha ai.
E pranishme në shpalosjen e artefakteve, ishte edhe zv/kryeministrja nga komuniteti boshnjak, Emilja Rexhepi.
Kjo tha se nëse një ngjarje e tillë harrohet, ajo mund të përsëritet.
“Është e rëndësishme që të shënohet ky moment, ta kujtojmë që edhe ne boshnjakët dhe shqiptarët e Kosovës e kishim të njëjtin armik, që tentoi të na zhdukte si popuj. Pra, me këtë shënim po duam që këtë tolerancë, paqen për të cilën po na flasin, ta aplikojmë, por mos ta harrojmë dhunën dhe jotolerancën të cilën e kaluam”, tha zv.kryemistrja e Kosovës, Emilija Rexhepi.
Ndryshe, në vitin 2007, Gjykata Ndërkombëtare e Drejtësisë në Hagë, krimin në Srebrenicë, e njohi si gjenocid.
Për këtë, ish-presidenti i Republikës Serbe, Radovan Karaxhiq, dhe komandanti i përgjithshëm i ushtrisë Ratko Mlladiq, u dënuan me burgim të përjetshëm.
