Shërbimi i Kërkim-Shpëtimit Malor të Kosovës (ShKShMK) është angazhuar për të nxjerrë trupin e pajetë të personit që dyshohet se ka rënë në një greminë në Grykën e Rugovës.
Sipas njoftimit të publikuar në Facebook, operacioni po zhvillohet në kilometrin e 7-të të Grykës së Rugovës, me pjesëmarrjen e Zjarrfikësve të Pejës dhe Policisë së Kosovës.
“OPERACION! ShKShMK është duke e zhvilluar një operacion në Grykën e Rugovës kilometrin e 7-të, së bashku me Zjarrfikësat e Pejës dhe Policinë e Kosovës. Dyshohet se një qytetar ka rënë në greminë, në afërsi të rrugës. Për informata tjera, ju informojmë me kohë!”, thuhet në njoftimin e shoqatës.
Më herët ishte raportuar se një person është gjetur pa shenja jete në rrugën Pejë–Rugovë, në vendin e njohur si “Kthesa e Madhe”.
Lajmin e ka konfirmuar zëdhënësi i Policisë për rajonin e Pejës, Fadil Gashi, i cili tha se trupi është gjetur poshtë në lumin Lumbardh.
“Rreth orës 14:10, Policia është njoftuar se në kilometrin e 5-të të rrugës Pejë–Rugovë, tek ‘Kthesa e Madhe’, poshtë në lum ku është Lumbardhi, dyshohet se një person është pa shenja jete. Mjeku e ka konstatuar vdekjen e tij. Policia menjëherë ka dalë në vendin e ngjarjes, bashkë me zjarrfikësit dhe ekipin mjekësor”, ka deklaruar Gashi.
