Është vetëm njëra nga disa shkollat e kryeqytetit që ka mungesë të shkallëve emergjente.
Pikërisht këtë problem e ka shkolla profesionale “Shtjefën Gjeçovi”.
E për një mungesë të tillë drejtori i shkollës, Blerim Gërvalla thotë se “faji” qëndron tek vjetërsia e objektit.
“Shkolla jonë fatkeqësisht hyn në grupin e shkollave që nuk ka shkallë emergjente. Ndoshta një arsye është që është objekti goxha i vjetër është diku i viteve të gjashtëdhjeta apo të shtatëdhjeta”, thotë Gralleva.
Ani pse sipas Gërvallës, në të kaluarën nuk kanë pasur nevoja për përdorimin e këtyre shkallëve, rreziku është permanent.
“Është ndërtuar me anekse pjesë pjesë, kështu që mungojnë ato shkallë është një hendikep për ne sepse çdo herë ekziston rreziku për arsye e se kemi së paku 500 nxënës në ndërrimin edhe staf 50/60 persona çdo herë janë në kuadër të një ndërrimi. Rreziku më i madh është nga zjarri për arsye se kemi shumë pajisje që mund të eksplodojnë për shembull bombolat e gazit duke salduar nxënësit, ato janë rrezik. Fatmirësisht nuk ka ndodh kurrë, për shkak të kujdesit ndoshta të madh por, ajo nuk përjashtohet në të ardhmen”, thotë ai.
E në anën tjetër nga Drejtoria për Siguri dhe Emergjenca, thonë se brenda këtij viti do investohet në disa shkolla që ka mungesë të kësaj natyre.
“Në këtë vit do të shikojmë se cila nga ato shkolla nuk kanë shkallë emergjente që të intervenojmë që ti vendosim. Mirëpo, çka është me rëndësi të theksohet se në të ardhmen kemi bërë kërkesa te drejtoritë përkatëse të Urbanizmit, Planifikimit që të gjitha shkollat e reja që të ndërtohen duhet t’i përmbushin standardet e sigurisë të kenë shkallë dhe dalje emergjente siç është e paraparë edhe me ligj.Po shpresojmë që së paku katër apo pesë shkolla edhe këtë vit të intervenojmë. Për fat të keq edhe buxheti jonë nuk është se është i madh, ne kemi një buxhet relativisht të mirë por që kemi prioritet edhe çështjet e tjera të sigurisë”, shprehet Fushtica.
Nga kjo drejtoria treguan për televizionin se vitin e kaluar kanë vendosur shkallë emergjente në katër shkolla në kryeqytet.
