Shkëndija e Tetovës ka bërë tashmë histori në kupat e UEFA-s këtë sezon.
Shkëndija është kualifikuar në raundin e tretë kualifikues të Ligës së Kampionëve, dhe minimalisht e ka siguruar grupet e Ligës së Konferencës.
Por, Shkëndija po synon grupet e Championsit apo Ligës së Evropës dhe për të arritur një gjë të tillë, tetovarët duhet ta eliminojnë Qarabagun në raundin e tretë kualifikues.
Ndeshjen e parë me Qarabagun, Shkëndija e luan të martën nga ora 20:00 në Shkup ndërsa para këtij dueli, trajneri Jeton Beqiri, ka folur për pritshmëritë.
Beqiri ka thënë se Shkëndija synon të avancojë tutje për të shkruar sukses të ri historik.
Edhe kapiteni Besart Ibraimi, foli për gëzimin e tij sepse do të luajë me Shkendijën në fazën e grupeve të një kompeticioni evropian
“Është më se e sigurt se ne, lojtarët, do të japim maksimumin. Nuk ka dyshim se Qarabag është një ekip cilësor, por ne do të përpiqemi t’i tejkalojmë ata. Dhe unë, sigurisht, besoj se mund të arrijmë një sukses të ri të madh dhe një tjetër historik. Duhet të besojmë në vetvete”, theksoi Ibrahimi, ndër të tjera.
