Disa të dyshuar për grabitje kanë shtënë me armë zjarri ndaj policëve në një pikë karburanti në Ferizaj, raporton teve1.info
Lajmin për teve1.info e konfirmoi zëdhënësi i Policisë së Kosovës për Rajonin e Ferizajt, Kanun Veseli, i cili tha se pjesëtarët e Policisë nuk kanë pësuar ndonjë lëndim.
Sipas Veselit, me të shtëna me armë grabitësve iu ka përgjigjur edhe policia, mirëpo grabitësit kanë arritur të largohen nga vendi i ngjarjes në drejtim të panjohur me një veturë të dyshuar “karavan” me ngjyrë teget.
“Sot rreth orës 04:50 kemi pranuar një informatë se në rrugën magjistrale Ferizaj-Prishtinë tek pika e karburantit “Hib Petrol” në Ferizaj ishte një grabitje e armatosur në proces nga persona të panjohur.
Patrulla e policisë me të arritur në vendin e ngjarjes, të dyshuarit kanë filluar të shtënë me armë zjarri në drejtim të veturës së policisë, duke dëmtuar në masë të madhe veturën zyrtare, mirëpo dy policët që ishin në veturë nuk kanë pësuar ndonjë lëndim, ndërsa shkëmbim zjarri kishte edhe nga ana e zyrtarëve policor, mirëpo të dyshuarit kanë arritur të largohen nga vendi i ngjarjes me një veturë dyshohet karavan ngjyrë teget, në drejtim të panjohur dhe në veturë dyshohet se ishin 4 perosna me armë të gjata.
Ekipe të policisë menjëherë kanë dalë në vendin e ngjarjes në asistim të patrullës së policisë, ndërsa rasti është cilësuar “Tentim vrasje, Shkaktim i rrezikut të përgjithshëm dhe grabitje e armatosur”, ka deklaruar Veseli.
