Kapakë të hequr nga pustetat e shenja paralajmëruese në rrugë.
E gjithë kjo si pasojë e reshjeve të shiut që kanë kapluar kryeqytetin.
Megjithatë masat e ndërmarra si duket nuk po mjaftojnë.
E për gjendjen e krijuar rrugëve të Prishtinës, qytetarët i vënë faj Komunës.
“Duhet me u bë kujdestari, se fuqia natyrore e vërtetë që mundet me u bë kështu, por për sa ka ra shi nuk është dashur me u marr rrugët në asnjë Komunë jo vetëm në Prishtinë, por në asnjë. Kujdestari nuk ka fare, mjetet ndahen për qito, po kërkojë që edhe qytetarët me ngrit zërin. Po kërkoj edhe nga kryetari me u merr me këtë, se për kaq shi nuk duhet me u marr”, shprehet Xhevdet Kastrati –qytetar.
Kurse, dikush tjetër thotë se si pasojë e reshjeve të shiut, rruga që zakonisht ai e përshkon për pak minuta, sot i doli më e gjatë.
“Dhjetë minuta, shumë vështirë edhe shi edhe baltë”, thotë qytetari Gëzim Ferati.
Ndërkohë, qytetari Burim Hasani ka një kërkesë konkrete.
“Është shume e vështirë per ne se po ka shumë, s’po ka as ku me kalu. Me i pastruar më mirë pusetat”, thotë Burim Hasani.
Pastrimin e pusetave të ujëmbledhësve dhe kanalizimeve si masë parandaluese e përmendin edhe nga opozita në Kryeqytet, duke akuzuar njëherazi Komunën e Prishtinës për reagim të vonshëm.
“Intervenimet e Komunës së Prishtinës edhe në katër vjeçarin e parë, por edhe tani që ka filluar bëhen vetëm në momentin kur del në pah ajo, domethënë dështimet e Komunës në aspektin e infrastrukturës. Gjithmonë janë ato intervenime me vonesë gjë që po shkakton dëme të pariparueshme materiale tek banorët”, shprehet Besart Krasniqi – asamblesit i LVV-së.
Por, ndryshe thonë nga Komuna e Prishtinës.
“Institucionet përkatëse të Kryeqytetit janë në gatishmëri të shtuar për monitorimin e situatës dhe ndërhyrje sipas nevojës”, ka thënë nga Drejtoria për Siguri dhe Emergjenca.
Ata madje apelojnë qytetarët të tregojnë kujdes të shtuar gjatë lëvizjes, veçanërisht në zona me prani të ujit të grumbulluar, t’i shmangin nënkalimet ose rrugët e përmbytura, si dhe të raportojnë me kohë çdo problem që paraqet rrezik për sigurinë publike.
