Instituti Kombëtar i Shëndetësisë Publike ka bërë të ditur se është shfaqur rasti i parë me ethe të minjve për këtë vit në Kosovë.
IKSHPK përmes një njoftimi ka thënë se kjo sëmundje kryesisht përhapet në mënyrë sporadike në rajonin e Shalës, Dukagjinit dhe rajone tjera, varësisht nga shumimi i minjve.
“Burimi i infeksionit janë minjtë. Sëmundja përhapet me ushqim, me aerosole dhe me kontakt. Rastet me ethe hemorragjike me sindromën renale sporadike janë të palidhura mes veti dhe nuk ka ndonjë shpërthim epidemik mes tyre, por pakujdesi gjatë ruajtjes së ushqimit dhe konsumimi i manave të palara mund të shkaktojë sëmundje vdekjepruese”, ka bërë të ditur IKSHPK.
Por cilat janë masat mbrojtëse sipas IKSHPK
Instituti ka bërë thirrje që të mbahet ushqimi larg brejtësve, të pengohet futja e tyre nëpër shtëpi dhe stane, të mos konsumohen frutat e pyllit pa u pastruar dhe masa të tjera.
