Me rastin e 26 Qershorit – Ditës Botërore Kundër Abuzimit dhe Trafikimit të Drogave, Ministria e Shëndetësisë në bashkëpunim me Institutin Kombëtar të Shëndetësisë Publike të Kosovës dhe Qendrën Rajonale të Shëndetësisë Publike në Gjilan kanë organizuar një tryezë të rrumbullakët për ndërgjegjësim dhe parandalim.
Sipas njoftimit zyrtar, ngjarja u zhvillua nën moton “Rri larg drogave – për një shoqëri të shëndetshme”, me fokus në rritjen e vetëdijes për rreziqet e përdorimit të substancave narkotike dhe forcimin e bashkëpunimit institucional në parandalim.
Në diskutime u theksua se grupet më të rrezikuara janë fëmijët dhe të rinjtë, ndërsa u nënvizua rëndësia e edukimit, ndërhyrjes së hershme dhe mbështetjes profesionale për personat e prekur nga varësia.
Gjatë aktivitetit u prezantuan edhe programet e realizuara gjatë vitit 2025 për edukim shëndetësor dhe parandalim të abuzimit me drogat, si dhe një analizë mbi ndikimin e tyre në shëndetin fizik, mendor dhe social.
Pjesë e programit ishin edhe aktivitete ndërgjegjësuese, përfshirë një shfaqje teatrale nga Teatri i Gjilanit dhe ekspozitë me punime kreative nga nxënësit, të cilat përcollën mesazhe kundër përdorimit të drogave.
Në aktivitet morën pjesë institucione të ndryshme, përfshirë Policinë e Kosovës, Forcën e Sigurisë së Kosovës, Kryqin e Kuq dhe përfaqësues të shoqërisë civile, të cilët ritheksuan angazhimin për vazhdimin e aktiviteteve parandaluese dhe mbrojtjen e shëndetit publik.
