Asdren Shala nga Partia Socialdemokrate, thotë se Partia Demokratike e Kosovës dhe Lidhja Demokratike e Kosovës, janë të frikësuar nga kryeministri, Albin Kurti dhe ambasadat e vendeve mike të akredituara në Kosovë.
Kjo deklaratë e Shalës erdhi pasi u pyet se çfarë po bëjnë këto dy parti opozitare, lidhur me situatën e fundit në veri, shkruan teve1.info.
“LDK e PDK janë në një situatë të keqe, por për ta është komode. Ata kanë frikë nga Kurti dhe nga ambasadat. Ata nuk guxojnë të veprojnë kundër Kurtit, ashtu siç do duhej të vepronte një opozitar normal. Ata tërë kohën veprojnë në hegjemoninë e Kurtit, ata bëjnë opozitarizëm ashtu siç i pëlqen Kurtit e me metoda të tij. Prandaj, këto parti, praktikisht i bie sikur të mos ekzistojnë fare”, deklaroi Shala në emisionin “Ditari”.
Duke folur për tensionimet në katër komunat veriore, Shala vlerësoi që është në interes të Bashkësisë Ndërkombëtare që Serbia të futet sa më shpejt nën orbitën e ndikimit evropian.
Ndërkaq, i pyetur se pse pikërisht tani Kosovës i është shtuar presioni nga ndërkombëtarët, duke marrë parasysh që situata në veri është qetësuar, Shala theksoi që ky është më shumë kusht për konsum të brendshëm politik.
“Unë besoj që amerikanët influencojnë edhe në Beograd që të marrë pjesë aty edhe faktori serb dhe të zgjidhen kryetarët në një votim më shumë gjithëpërfshirës”, shtoi tutje Shala në Tëvë1./teve1.info/.
