Sipas Shalës, Radojçiq është një person i cili ka marrë një mori instruksionesh se si duhet të veprojë.
Në “Info Nata” në Tëvë 1, Shala tha se institucionet e Kosovës duhet që të angazhohen për të zbuluar vendndodhjen e Radojçiqit, i kërkuar edhe për rastin “Brezovica”.
“Çështja e deklarimit të tij përmes video-inicizimit është një tregues i drejtpërdrejt edhe për institucionet e sigurisë të Kosovës. Pra duhet të angazhohet gjithë mekanizmi dhe duhet të ketë edhe shtim të kapaciteteve, nëse janë të nevojshme, të lokalizimit të personit në fjalë. Sepse ne e dimë që Milan Radojçiq ka strukturën e tij kriminale në pjesën veriore. Njëkohësisht ka edhe mbështetjen nga ministri i Punëve të Brendshme të Serbisë, përmes strukturës të shtetit”, tha ai.
Radojçiq u shfaq sot përmes një video-mesazhi, që pretendoi se e bëri të martën në Leposaviq.
Lideri i strukturave paralele në veri të vendit u paraqit disa ditë pas vendimit të Qeverisë së Kosovës për targat. /Teve1.info/
