Për tri orë, qytetarët serbë në Rudar të Serbisë kanë bllokuar rrugën. Krejt kjo në kundërshtim të vendimit të fundit të Bankës Qendrore të Kosovës, në lidhje me përdorimin e dinarit serb në Kosovë. Kjo bëri që disa vetura me shoferë shqiptarë të kthehen prapa, pas njoftimit nga zyrtarët kufitar.
Kosovën vendosën ta lënë përmes pikës kufitare në Merdare.
Por këtu, shoferët shqiptar mesditën e së hënës, po marrin një informacion të rëndësishëm.
Këta u njoftuan se matanë kufirit, serbët kanë bllokuar rrugën në Rudar të Serbisë.
Këta të fundit, nga ora 12:00 vendosën këto barrikada, për shkak të vendimit të fundit të Bankës Qendrore te Kosovës, në lidhje me përdorimin e dinarit serb në Kosovë.
E në kohën kur në Serbi po fillonte protesta, numri i veturave u pakësua në këtë pikën kufitare në Merdare.
Edhe pas orës 12:00, ndonësë në numër më të vogël, po vazhdon qarkullimi i veturave përmes pikës kufitare në Merdare.
Protesta në Rudar, bëri që disa vetura të mërgimtarëve, të kthehen prapa.
“Policia shumë mirë u shpreh, garanci nuk ka. Unë tash ose do të vazhdoj për Mitrovicë, ose do të pres për disa orë”, tha mërgimtari nga Sllovenia, Ekrem Binaj.
E dikush tjetër, thotë se për protestën serbe, nuk ishte i njoftuar më herët.
“Jo, nuk kemi pas informata”, tha mërgimtari nga Italia, Naim Kadrija.
Por njoftimin e kishte bërë paraditen e së hënës, Qendra Kombëtare për Menaxhimin Kufitar.
“Njoftohen të gjithë qytetarët të cilët planifikojnë të udhëtojnë përmes Pikë Kalimit Kufitar në Merdarë, se në pjesën e SRB, për sot janë paralajmëruar protesta dhe bllokim të rrugëve, prej orës 12:00-15:00. Ju inkurajojmë që të përdorni PKK tjera për qarkullim”, ëhstë bërë e ditur nga Qendra Kombëtare për Menaxhim Kufitar e MPB-së.
Ndërkohë pas orës 14;00,u bë e ditur se protesta ka përfunduar, ndërsa rruga u hap për qarkullim.
Ndryshe, një bllokadë e tillë prej treorëshe, është paralajmëruar të mbahet çdo të hënë.
