Deputeti i LDK-së, Driton Selmanaj, deklaroi që takimi i sotëm në Bruksel ndërmjet kryeministrit Albin Kurti dhe presidentit serb, Aleksandar Vuçiq, nuk po bëhet në koordinim me Kuvendin e Kosovës dhe forcat politike të saj.
Gjatë seancës plenare në Kuvend, Selmanaj tha se Qeveria është e obliguar të raportojë para dhe pas çdo procesi negociator, gjë që sipas tij, nuk po ndodhë, raporton teve1.info.
“Sot është duke ndodhur një takim në Bruksel mes kryeministrit Kurti dhe presidentit Vuçiq. Më thoni ju, a e din dikush agjendën për çfarë po takohen këta dy njerëz. Më thoni, a e keni idenë më të vogël se cila është tema që do të diskutojnë këta të dy. Po iu kujtoj që Kuvendi i Kosovës ka miratuar tri rezoluta që e obligojnë Qeverinë e Kosovës para dhe pas çdo procesi negociator, të raportojë në Kuvendin e Kosovës. Pyetja shtrohet që ky takim a po bëhet me koordinim apo pa kooordinim. Përgjigja është që në koordinim me Kuvendin e Kosovës dhe me forcat politike në Kosovë, jo nuk është koordinuar”, deklaroi Selmanaj para deputetëve në Kuvend.
Kujtojmë që Bashkimi Evropian, si ndërmjetësues i procesit, ka njoftuar se takimi i diplomatëve evropianë, Josep Borrell dhe Mirosllav Lajçak, me Vuçiqin ka mbaruar, ndërsa në zhvillim e sipër është takimi i tyre me Kurtin./teve1.info/.