Policia Kufitare në Portin e Durrësit ka sekuestruar një shumë prej 223,200 eurosh, të padeklaruara nga një 36-vjeçar me inicialet M.D, rezident në Itali.
Gjatë kontrollit rutinë, shuma e konsiderueshme e parave u gjet në çantën e shpinës së tij, ndërsa ai po tentonte të largohej nga Shqipëria.
Dyshimet e para të autoriteteve janë se paratë mund të jenë produkt i veprimtarive kriminale, ndaj ato janë sekuestruar në kuadër të hetimeve të mëtejshme.
Policia ka arrestuar 36-vjeçarin dhe materialet hetimore i ka referuar Prokurorisë së Durrësit, e cila do të vijojë hetimet për të përcaktuar origjinën e shumës së sekuestruar./rtsh.al
