Prokuroria Themelore në Prishtinë ka autorizuar Policinë e Kosovës për ndërmarrjen e veprimeve shtesë hetimore lidhur me rastin e keqtrajtimit të një fëmije 5-vjeçar në komunën e Lipjanit.
Sipas njoftimit zyrtar, qëllimi i këtij autorizimi është identifikimi i përgjegjësisë eventuale të zyrtarëve të Qendrës për Punë Sociale në Lipjan, apo zyrtarëve të tjerë kompetentë të komunës, të cilët mund të kenë pasur rol direkt apo indirekt në këtë rast.
“Autorizimi lidhet me ndërmarrjen e veprimeve të nevojshme hetimore për të identifikuar përgjegjësinë eventuale të zyrtarëve kompetentë”, thuhet në njoftimin e Prokurorisë.
Rasti doli në dritë pas arrestimit të dy prindërve në Lipjan, të cilët dyshohen se kanë keqtrajtuar fëmijën e tyre 5-vjeçar.
Sipas Policisë së Kosovës, fëmija është dërguar për trajtim në Qendrën Klinike Universitare të Kosovës (QKUK), me plagë të rënda në të dy shputat e këmbëve.
Fillimisht, rasti është cilësuar si “shkelje e detyrimeve familjare”, ndërsa të dyshuarit janë dërguar në mbajtje.
Nga ana tjetër, QKUK ka bërë të ditur se fëmija është pranuar në gjendje të rëndë shëndetësore, ndërsa ekzistojnë dyshime edhe për kequshqyerje.
Hetimet për këtë rast janë në vazhdim.
