Kuvendi i Kosovës është duke vazhduar punimet në seancën e jashtëzakonshme edhe pas orës 22:00, ku janë miratuar në parim disa projektligje duke përfshirë ato për Lojërat Mesdhetare, financimin dhe menaxhimin e resurseve ujore, projektligjin për banim të përballueshëm dhe social, si dhe projektligji për çmimet tavan.
Në të njëjtën seancë, me 65 vota pro, është miratuar edhe në parim projektligji për sigurimin e detyrueshëm të kujdesit shëndetësor, që konsiderohet një nga reformat më të mëdha në sistemin shëndetësor.
Ndërkohë, në emisionin “Këndi i Debatit”, deputeti i Lëvizjes Vetëvendosje, Abdullah Klinaku, ka mbrojtur dinamikën e punës së Kuvendit, pasi që nga deputetët e opozitës pati kritika që këto projektligje po miratohen për nguti, për shkak të arsyeve edhe elektorale.
Ai tha kritikat janë të pashmangshme pavarësisht nëse ligjet nuk procedohen apo miratohen në numër të madh.
Sipas tij, nevoja për ligje është thelbësore për funksionimin institucional dhe zhvillimin e vendit, ndërsa ka theksuar se deputetët kanë pasur kohë të mjaftueshme për shqyrtimin e projektligjeve, të cilat janë dërguar disa ditë më parë në e-mail.
“Me bë mos me dërgua ligje në Kuvend thonë që s’po punoni, me çu ligje thonë që po punoni shumë. Unë besoj që mesi i kësaj pune, është nevoja e ligjeve për me ecë përpara. Është një mesatare e këtij mendimi, për shkak se është nevoja e këtyre ligjeve që me ecë tutje. Këto projektligje i kemi para tetë dite, të cilat janë dorëzuar në e-mail tonë dhe kemi pasur mundësi me i lexu”, deklaroi ai në Tëvë1.
Klinaku ka shtuar se, pavarësisht angazhimit për përmbylljen e agjendës legjislative, duhet të merret parasysh edhe procesi politik në vend, përfshirë afatet kushtetuese për zgjedhjen e presidentit dhe funksionimin e institucioneve me kompetenca të plota.
Seanca, sipas tij, është pjesë e një periudhe të rëndësishme kur Kuvendi duhet të përmbyllë sa më shumë punë përpara zhvillimeve të tjera institucionale në vend.
“Përkundër përpjekjes tonë maksimale për me zgjedh çështjen e presidentit e kemi një afat kohor kur duhet ta kemi parasysh çdo njëri prej neve, në kuadër të këtij afati dhe në kuadër të krejt procesit tjetër që zhvillohet krahas këtij afati duhet me i kry punët që mos me mbet asnjë gjë pa i përfundua brenda kësaj periudhe kohore, kur Kuvendi është me kompetenca të plota. Nëse vazhdohet ashtu siç është edhe planifikimi për me gjet një kandidat ku mundemi me zgjedh edhe presidentin në kuadër të afatit, atëherë ne kemi një infrastrukturë shumë të mirë me institucione të formuara”, tha ai. /teve1.info/
