Kryeministri Edi Rama ka publikuar një foto të logos së takimit të samitit në rrjetin social Facebook, teksa ka shkruar se shpreh kënaqësinë që samiti BE-Ballkani Perëndimor do të mbahet në Shqipëri.
Rama ka shkruar se shqiptarët e shohin të ardhmen në familjen e madhe evropiane.
“Mirëmëngjesi dhe me kënaqësinë e vendit mikpritës për herë të parë të Samitit BE-Ballkani Perëndimor, një ngjarje historike, me respektin për ne që të ardhmen e shohim në familjen e madhe europiane, ju uroj një ditë të mbarë”, shkruan Rama.
Samiti është pjesë e zbatimit të Agjendës Strategjike të Këshillit Evropian 2019-2024, si dhe konsiderohet një mundësi për të rikonfirmuar rëndësinë kyçe të partneritetit strategjik midis BE-së dhe Ballkanit Perëndimor, një rajon me një perspektivë të qartë drejt BE-së.
