Autori i librit “Vargjet Satanike”, me origjinë indiane, i cili para disa viteve u urdhërua të vritej nga Irani për shkak të shkrimeve të tij, u sulmua me thikë, më 12 gusht, gjatë një seminari në skenën e Institutit Chautauqua në shtetin e Nju Jorkut.
Policia identifikoi sulmuesin, Hadi Matar, 24 vjeçar, nga Nju Xhersi dhe e arrestoi atë në vendin e ngjarjes.
Deri tani asnjë akuzë nuk është ngritur kundër tij dhe sipas policisë ende nuk dihen motivet e sulmit.
Andrew Wylie, agjenti i Rushdies, tha në një deklaratë se shkrimtari i ishte nënshtruar një operacioni, pasi dëmtimeve që ka pësuar në mëlçi dhe nervave të prera në krahun e tij dhe se ka gjasa të humbiste njërin sy.
Institutit Chautauqua në shtetin e Nju Jorkut, vendi ku u sulmua ai, është i njohur për serinë e leksioneve të verës, ku Rushdie ka folur aty edhe më parë.
I dyshuari hyri në skenë ndërsa Rushdie po prezantohej dhe e sulmoi atë dhe moderatorin Henry Reese, tha Policia e Shtetit të Nju Jorkut në një deklaratë.
“Rushdie pësoi plagë të dukshme me thikë në qafë dhe u transportua me helikopter në një spital të zonës. Gjendja e tij ende nuk dihet”, thuhet në deklaratë.
Reese pësoi një dëmtim të lehtë në kokë.
Rushdie, i cili ka lindur në një familje muslimane indiane, është përballur me kërcënime me vdekje për romanin e tij të katërt, “Vargjet Satanike”, për të cilin disa muslimanë thanë se përmbante pasazhe blasfemuese. Romani u ndalua në shumë vende me popullsi të madhe myslimane pas botimit të tij në vitin 1988.
Rushdie ka lindur në Mumbai të Indisë. Ai ka nënshtetësi britanike dhe amerikane dhe jeton në Nju Jork që nga viti 2000, sipas Politico.
