Zëvendësministri i Drejtësisë, Blerim Sallahu ka vazhduar me akuza ndaj Këshillit të Pavarur Mbikëqyrës të Shërbimit Civil, pasi fillimisht e quajti absurd rikthimin në punë të Kryeinspektorit të Inspektoratit në Ministrinë e Drejtësisë, Ylber Topalli.
Sallahu thotë se përveç Topallit, në punë janë rikthyer edhe dy persona të infiltruar direkt në rastin Dehari.
“Këshilli i “Pavarur” Mbikëqyrës i Shërbimit Civil paska kthyer në punë edhe Destan Zogajn e Burim Buleshkajn, të involvuar direkt në rastin Dehari. Të dy sëbashku e bashkë me Ylber Topallin pa asnjë bazë ligjore kanë bartur kamerat nga burgu i Prizrenit drejt në dorën e Dhurata Hoxhes – ish ministre e Drejtësisë”, ka shkruar Sallahu.
Sipas tij KMSHC-në po e ‘sundojnë’ partitë opozitare.
“Organizimi dhe funksionimi kriminal ka adresë. Ftoj sërish PSRK-në të merret me Raportin e Inspektoriatit të Ministrisë së Drejtësisë dhe me procesin e marrjes së këtyre vendimeve nga anëtarët e partive opozitore që e sundojnë KPMSHC-në”, ka shkruar ai.
