Sadiku tha se partnerët ndërkombëtarë të Kosovës kanë sugjeruar të arrihet sa më shpejt marrëveshja finale me Serbinë.
“E kemi pasur një konfirmim të ambasadave kryesore të vendeve të BE-së dhe të ShBA-së se mbështesin Qeverinë e Kosovës në zbatimin e marrëveshjeve të Brukselit duke përfshirë këtu edhe reciprocitetin në targa. Kjo duhet të zbatohet me një qetësi të caktuar dhe pa një populizëm për brenda. Miqtë tanë ndërkombëtarë na kanë sugjeruar se rruga më e drejtë dhe më e mirë është që ne përmes dialogut të mbërrijmë deri tek marrëveshja me Serbinë”, tha Sadiku në emisionin “Ditari” në Tëvë1.
Sipas tij, Serbia nuk zbaton marrëveshjet e nënshkruara në Bruksel, teksa shtoi që interesi i tyre është të mos vazhdohet tutje me dialog.
“Serbia shumicën e marrëveshjeve të nënshkruara në Bruksel nuk i zbaton. Mirëpo, prapë se prapë, Kosova duhet t’i përfundojë detyrat e saj, nuk duhet të bazohet në vendimet destabilizuese që i ndërmerr Serbia. Kjo sepse interesi i Serbisë është që mos vazhdohet tutje me dialog, të ketë bllokada në veri dhe në të gjitha komunat ku jetojnë serbët. Interesi i Kosovës është i kundërt, sepse ne e kemi vetëm një rrugë, ndërsa ata i kanë disa”, tha tutje ai.
