Moska do të respektojë kufijtë e paktit të fundit të armëve bërthamore me Shtetet e Bashkuara që skadoi javën e kaluar, për sa kohë që sheh se Uashingtoni po bën të njëjtën gjë, tha të mërkurën diplomati më i lartë i Rusisë.
Duke folur të mërkurën në dhomën e ulët të parlamentit, Ministri i Jashtëm rus Sergey Lavrov tha se edhe pse SHBA-të nuk i janë përgjigjur ofertës së Putinit, Rusia do të respektojë kufizimet e START-it të Ri për aq kohë sa sheh që edhe SHBA-ja e zbatojnë ato, raporton AP.
“Ne do të monitorojmë nga afër se si po zhvillohen gjërat në të vërtetë”, tha Lavrov. “Nëse qëllimi i kolegëve tanë amerikanë për të ruajtur një lloj bashkëpunimi në këtë drejtim konfirmohet, ne do të punojmë në mënyrë aktive për një marrëveshje të re dhe do të shqyrtojmë çështjet që kanë mbetur jashtë marrëveshjeve të stabilitetit strategjik.”
Traktati i Ri START skadoi më 5 shkurt, duke mos lënë kufizime në dy arsenalet më të mëdha atomike për herë të parë në më shumë se gjysmë shekulli dhe duke nxitur frikën e një gare të pakufizuar armësh bërthamore .
Presidenti rus Vladimir Putin vitin e kaluar deklaroi gatishmërinë e tij për t’iu përmbajtur kufizimeve të traktatit për një vit tjetër nëse Uashingtoni do të ndiqte shembullin, por Presidenti i SHBA-së Donald Trump ka argumentuar se dëshiron që Kina të jetë pjesë e një pakti të ri – diçka që Pekini e ka refuzuar.
