Rreth dy javë më parë filloi sezoni ngrohës për gjitha lagjet e Prishtinës që janë të kyçura në ngrohtoren e qytetit “Termokos”.
Ndonëse i vonuar e pas shumë ankesave, këtë vit edhe filloi zgjerimi i rrjetit i ngrohjes për disa objekte banesore.
“Aktualisht jemi në proces të zgjerimit dhe rehabilitimit të rrjetit të ngrohjes e cila është duke u mundësuar nga qeveria Gjermane nëpërmes Bankës Gjermane për zhvillim me një bashkfinancim nga qeveria e Luksemburgut, komuna e Prishtinës dhe nga Termokos”, tha zëdhënësja e Termokosit, Afërdita Uka.
Tutje ajo thotë se janë 221 objekte të reja banesore, që në njërën prej lagjeve të kryeqytetit do të kyçen me ngrohje.
“Rrjeti i ngrohjes është shtrirë nga Mati I përkatësisht në rrugën Muharrem Fejza dhe rrugica përreth tyre. Në këtë lagje do të kyçen 221 objekte të reja banesore gjatë këtij sezoni ngrohës, tashmë disa janë përgatitur. Shumë shpejt do të fillojë furnizimi me ngrohje. Pra është zgjeruar rrjeti i ngrohjes, ka arritur deri në 86 objekte të vjetra banesore në qytetin e Prishtinës. Tashmë po fillojnë edhe punimet për zgjerimin e ngrohjes në Lagjen Arbëria ku do të kyçen rreth 34 objekte banesore të kësaj lagje, është pjesa e poshtme e kësaj lagje, deri tek ndërtesa e Komunës së Prishtinës deri tek rrethi në afërsi të stadiumit Fadil Vokrri”, tha ajo.
Ajo nuk la pa përmendur edhe faktin se në të kaluarën ndërmarrja kishte probleme financiare.
“Në të kaluarën derisa është realizuar projekti i kohëzgjerimit Qeveria dhe komuna e Prishtinës kanë qenë mbështetësit e vetëm tonë, pasi ndërmarrja ka qenë në kushte të rënda financiare”, shtoi ajo.
Ndryshe, ngrohrorja e kryeqytetit Termokos ka njoftuar konsumatorët se nuk ka ndryshim të çmimeve të ngrohjes edhe për këtë sezon.
Kronika e realizuar nga gazetarja Lendrina Kodrolli.
