Kandidati për deputet nga Partia Demokratike e Kosovës, Artan Behrami, ka folur në emisionin “Info Nata” në Tëvë1 lidhur me listën zgjedhore të PDK-së të paraqitur për zgjedhjet e 28 dhjetorit.
Behrami tha se lista e PDK-së përfaqëson një kombinim të figurave të reja dhe atyre me përvojë, duke e cilësuar atë si listë fituese.
“Kjo listë është listë e fitores. Edhe pse kanë kaluar vetëm 7–8 muaj nga zgjedhjet e kaluara, në listën e PDK-së ka pasur rifreskim dhe ndryshime, përfshirë edhe listën e parë. U është dhënë hapësirë figurave të reja, por edhe figurave të fuqishme të PDK-së, të cilat janë të shpërndara në gjithë listën”, ka thënë Behrami.
Sipas tij, lista e përpiluar nga kandidati për kryeministër Bedri Hamza garanton mobilizim të madh elektoral.
“Kjo listë, të cilën e ka përpiluar Bedri Hamza, garanton nënmobilizime shumë të mëdha të PDK-së. Unë besoj se Bedri Hamza, me vizionin e tij, nuk po krijon gravitet vetëm për PDK-në, por edhe për votuesit e partive të tjera, sepse ai bashkon njerëzit dhe nuk i përjashton”, u shpreh Behrami.
Tutje, Behrami ka komentuar edhe sloganin e Lëvizjes Vetëvendosje, duke e krahasuar atë me narrativa të së kaluarës.
“Mua ma kujton shfaqjen e filmave të kohës së Enver Hoxhës, kinse ‘Shqipëria e re’. Fjala ‘begati’ e mbyt tregun e lirë si nocion, ndërsa slogani ‘mos lëshoni pe’ synon të demonizojë gjithë procesin e dialogut, përmes të cilit Kosova e ka fituar lirinë, pavarësinë dhe shtetësinë”, ka deklaruar Behrami.
Ai shtoi se Vetëvendosje i ndryshon sloganet dhe qasjen politike varësisht nga matjet e opinionit publik.
“Ata i ndryshojnë sloganet, taktikat, teknikat dhe nivelin e gjuhës varësisht nga matjet e opinionit publik. Nëse matjet thonë se nuk është mirë t’i quajnë kundërshtarët tradhtarë, ata janë në gjendje t’i quajnë heronj. Nëse matjet thonë t’i quajnë tradhtarë, atëherë i quajnë tradhtarë”, përfundoi Behrami.
