Kandidati për deputet nga radhët e partisë Guxo, Nezir Kraku, ka folur në emisionin “Këndi i Debatit” në Tëvë1 për arsyet pse Lëvizja Vetëvendosje e ka nisur fushatën zgjedhore në mërgatë.
Kraku tha se kjo fushatë është më e shkurtër se herët e kaluara dhe se, sipas tij, në të kaluarën nuk i është kushtuar vëmendje e mjaftueshme mërgatës.
“Meqenëse fushata është më e shkurtër kësaj here dhe kemi vetëm 10 ditë zyrtarisht, e pamë të udhës që mërgatën ta konsiderojmë që në start. Herën e fundit nuk ka qenë mirë që gjatë gjithë asaj kohe nuk i kemi kushtuar vëmendje sa duhet mërgatës”, ka thënë Kraku.
Ai theksoi rëndësinë e jashtëzakonshme të mërgatës për Kosovën, duke vlerësuar kontributin e saj ndër vite.
“Mërgata është absolutisht shumë e rëndësishme dhe jashtë politikës. Duhet ta pranojmë të gjithë se mërgata është shtylla që e ka mbajtur Kosovën para luftës, e ka financuar luftën dhe më pas ka kontribuar në rindërtimin e Kosovës”, u shpreh Kraku.
Sipas tij, përfshirja e mërgatës në proceset politike dhe shtetërore është e domosdoshme dhe duhet të trajtohet me seriozitet që nga fillimi i fushatës.
