Këtë të mërkurë vizitoi Klinikën e Onkologjisë.
E para e shtetit, Vjosa Osmani, nga atje tha se këtë vit, Presidenca ka dhuruar 640 pako onkologjike për të prekurit me kancer të gjirit.
Siç tha Osmani, kjo nuk do të jetë ndihma e vetme për personat që përballën me këtë sëmundje.
“Natyrisht që përpjekjet tona nuk përfundojnë me kaq, sepse çdo vit shtyjnë përpara edhe amendamentet në buxhet që do ta rrisim buxhetin e nevojshëm për listën e barnave të cilat janë të domosdoshme për pacientët me këtë lloj kanceri, por edhe për gjithë ata që janë pacientë të Onkologjisë”, ka thënë Osmani.
Nafije Latifi, drejtoreshë e Qendrës ‘Jeta-Vita’ dhe vetë e mbijetuar e kancerit të gjirit, apeloi për krijimin sa më të shpejtë të një qendre të kujdesit paliativ, pasi aktualisht një shërbim i tillë nuk ekziston në vend.
“E fundit është kjo nevoja e domosdoshme për një qendër të kujdesit paliativ, e cila i mungon Kosovës dhe pacientëve kosovar. Njëkohësisht shumë mirënjohëse ndaj stafit të Klinikës së Onkologjisë, në krye me drejtorin Ilir Kurtishi, të cilët bëjnë punë të jashtëzakonshme me pacientët më të rëndë për sëmundjen e kancerit. Këta janë 24 orë në shërbim të tyre dhe e bëjnë të pamundurën që të ju lehtësojnë dhimbjet dhe t’i shërojnë”, ka thënë Latifi.
Kurse sipas drejtorit të klinikës së Onkologjisë Ilir Kurtishi, furnizimi me barna për këtë klinikë është më se i domosdoshëm.
“Meqë numri i pacientëve të cilët ne trajtojmë gjatë ditës kap shifra mbi 200, 250 persona. Dhe më shumë se 1500 raste të reja për herë të parë këtë vit janë lajmëruar në klinikë, kjo tregon se sa është e domosdoshme që të kemi furnizime të rregullta me barna dhe aparaturë të cilën veç e kemi, staf infiermieror dhe të bëjmë më të mirën e mundshme që secili qytetar i Kosovës të trajtohet në institucionet publike”, ka thënë Kurtishi.
Muaji tetor është i njohur ndryshe edhe si muaji Rozë.
