Për 26 vite me radhë, përjetimet e tyre i mbajtën brenda.
Dy burra të dhunuar seksualisht, pas rrëfimit publik të Ramadan Nishorit për dhunën që ishte bërë gjatë luftës, vendosën ta thyejnë heshtjen.
Tmerrin të cilin e përjetuan ata, vendosën ta ndajnë edhe me një nga qendrat e rehabilitimit të viktimave të dhunës seksuale në Drenas.
Detaje për këtë dha drejtoresha e qendrës Kosovare për Rehabilitimin e të Mbijetuarve të Torturës (QKRMT).
“Janë dy burra që janë lajmëruar në organizatën tonë bashkëpunëtore në Drenas mirëpo ka edhe shumë të tjerë që na kanë kontaktuar. Burrat e kanë shumë më vështirë, këtu na përballë e kemi parkun shumë nga ata na kanë thënë që kemi qëndruar nga një vjet dy në park të ulur vetëm me pa se kush po hin në organizatë”, tha Feride Rushiti nga QKRMT-ja.
Rushiti tregoi se si Ramadan Nishori mori guximin që historinë e tij ta shpalos jashtë mureve të qendrës.
“Ka qenë pjesë e dhjetëra aktiviteteve në organizatë, ka qenë në shumë intervista ku nuk ka dal me identitet dhe erdh momenti kur ai kërkoi nga psikologia me gatishmërinë e tij që më fillu me përgatit si storje si histori të ngjarjes së luftës që më mos ta kishte vetëm të vetën por dedikohet tërë shoqërisë kosovare. Pas një përgatitje intensive me të, me familjarët e tij vendosëm që më 14 prill në ditën memoriale të të mbijetuarve të dhunës seksuale të luftës që historia e tij të mos jetë e tij por të jetë një kërkesë për drejtësi, një krismë për shpresë një triumf për guxim dhe në atë formë të fuqizojmë zëra që ende jetojnë në errësirë dhe nuk e kanë guximin për të kërkuar ndihmë”.
E nga janari i këtij viti e deri në fillim të majit, 74 persona kanë aplikuar në Komisionin Qeveritar për t’u njohur statusi i të dhunuarve seksualë gjatë luftës.
“Në periudhën kohore Janar 2025 deri 8 Maj 2025 kemi pranuar gjithsej 74 aplikacione, aplikacionet pranohen të mbyllura dhe nuk mund të bejmë ndarje gjinore para se të trajtohen aplikacionet. Në periudhën e lartcekur, Komisioni ka trajtuar 127 aplikacione nga to 55 raste janë aprovuar (51 femra dhe 4 meshkuj) dhe 19 raste janë refuzuar (15 femra dhe 4 meshkuj)”, thuhet nga Komisioni Qeveritar për Njohjen e Statutit të Personave të Dhunuar Gjatë Luftës.
Sipas të dhënave të këtij komisioni që nga fillimi i procesit me 05 shkurt 2018 e deri më tani janë dorëzuar gjithsej 2253 aplikacione, nga to statusin viktimë e dhunës seksuale e kanë fituar gjithsej 1775 persona, nga ta 1675 femra dhe 100 meshkuj ndërsa 346 kërkesa janë refuzuar nga to, 293 femra dhe 53 meshkuj.
