Këshilltarët e vaksinimit në ShBA hoqën sot një rekomandim të hershëm që të gjithë fëmijët në ShBA të marrin vaksinën e hepatitit B në lindje.
Komiteti votoi për të mbajtur vaksinimin e lindjes vetëm për foshnjat e lindura nga më pak se një për qind e nënave që rezultojnë pozitive për virusin, duke zëvendësuar një rekomandim universal të vitit 1991 që synonte të mbronte të gjithë fëmijët nga infeksioni i hepatitit B, i cili mund të shkaktojë sëmundje të rëndë të mëlçisë.
Në shumicën dërmuese të rasteve, ato në të cilat nënat janë negative, komiteti arriti në përfundimin se mjekët dhe prindërit duhet të konsultohen nëse dhe kur të fillojnë serinë e vaksinimit, dhe rekomandoi që prindërit t’i japin fëmijës së tyre dozën e parë para moshës dy muajsh.
Ekspertët e shëndetit publik dhe grupet mjekësore, përfshirë Shoqatën Amerikane të Mjekësisë (AMA), e kritikuan vendimin, duke thënë se krijon pengesa për vaksinën dhe bie ndesh me dekada provash për sigurinë dhe efektivitetin e saj.
Vaksinimi në lindje ka ulur numrin e fëmijëve të infektuar me hepatit B në Shtetet e Bashkuara në 20 mijë, në vitin 1991.
Akademia Amerikane e Pediatrisë tha se vazhdon të mbështesë dhënien e vaksinës në lindje.
Hepatiti B përhapet kryesisht përmes gjakut, spermës ose lëngjeve të tjera trupore dhe përmes kontaktit të ngushtë me njerëz që nuk e dinë se janë të infektuar.
Organizata Botërore e Shëndetësisë rekomandon që të gjithë të porsalindurit të marrin vaksinën kundër hepatitit B pas lindjes, e ndjekur nga dy ose tre doza të vaksinës me të paktën katër javë diferencë. Ajo paralajmëron se 95 për qind e të porsalindurve të infektuar do të zhvillojnë hepatit kronik.
