Armend Zemaj nga Lidhja Demokratike e Kosovës është shprehur i bindur se pas zgjedhjeve të 28 dhjetorit, LDK-ja do të marrë drejtimin e Qeverisë së Kosovës.
Ai tha se kryeministër i vendit do të jetë kryetari i partisë, Lumir Abdixhiku.
“LDK-ja do ta udhëheqë Qeverinë e ardhshme të Kosovës. Kryeministër do të jetë Lumir Abdixhiku. Kaq mund të them. Jemi të bindur, shumë të bindur. Do të ndodhë. Do të vij prapë në këtë studio, por nuk e di në cilin pozicion, por do ta kem rastin të flas për qeverinë e re”, tha Zemaj në emisionin “Info Nata” në Tëvë1.
Ai theksoi se LDK-ja garon me program dhe vizion të qartë.
“Ne do ta udhëheqim Kosovën. Më kë? Do të vendosin zgjedhjet e 28 dhjetorit. Aty matet pesha programore dhe pesha politike, si edhe mundësia e bashkëudhëtimit për të mirën e Kosovës”, u shpreh ai.
Zemaj shtoi se LDK-ja nuk hyn në garë me dilema dhe se të gjitha subjektet e tjera politike janë kundërshtarë elektoralë.
“LDK-ja nuk hyn në garë me ‘nëse’. Jemi në garë elektorale. Me ish-opozitën jemi të njëjtë në kuptimin politik, sepse janë kundërshtarë. Por ata që punojnë për progresin e Kosovës dhe që dëshmojnë përmes programit afërsi me temat zhvillimore të vendit, natyrisht se mund të jenë partnerë të mundshëm në qeverisje”, përfundoi ai.
