Kapiteni i Kombëtares së Kosovës, Amir Rrahmani ka insistuar se Napoli e meritoi plotësisht fitoren ndaj Juventusit, ndeshje që u luajt të dielën mbrëma dhe përfundoi 2:1 në favor të kampionit në fuqi të Italisë.
Pas triumfit në ndeshje derbi të Serie A, Rrahmani ka thënë se Napoli tani duhet të fokusohet për të siguruar një vend në play-offin e Ligës së Kampionëve.
Napoli, që aktualisht është lider në kampionatin italian, të mërkurën mbrëma luan në udhëtim te Benfica në kuadër të Championsit.
Rrahmani pati një paraqitje të mirë në fitoren ndaj Juventusit, ku ishte i pazëvendësueshëm te Napoli.
Pas ndeshjes, Rrahmani deklaroi se duhet ta shijojnë këtë fitore, ndonëse insistoi se Napoli e meritoi plotësisht.
“Këto janë tri pikë të rëndësishme ndaj një skuadre të fortë që po garon për vendet kryesore. Duhet ta festojmë fitoren sepse luftuam fortë dhe e merituam”, tha Rrahmani.
Mbrojtësi kosovar foli edhe për trajnerin e Juventusit, Luciano Spalletti, duke e quajtur ndër trajnerët më të mirë që e ka pasur ndonjëherë.
Në fund, Rrahmani përkujtoi se Napolin në mesjavë e pret një ndeshje e vështirë në Portugali, të cilën duhet ta fitojë për të shkuar drejt “play-offit” të Ligës së Kampionëve.
