Policia e Kosovës ka arrestuar gjashtë persona në komunën e Vitit, pas një përleshjeje fizike që ka ndodhur pas një mosmarrëveshjeje mes tyre.
Sipas raportit zyrtar të Policisë së Kosovës, “më datë 15.10.2025, rreth orës 14:30, janë arrestuar gjashtë të dyshuar meshkuj kosovarë, pasi që të njëjtit pas një mosmarrëveshjeje janë rrahur në mes veti”.
Nga rrahja, të gjithë të përfshirët kanë pësuar lëndime trupore të lehta dhe janë dërguar për trajtim mjekësor.
“Gjatë kontrollit në vendin e ngjarjes është gjetur dhe konfiskuar 5.38 gram substancë e dyshuar narkotike,” thuhet më tej në raport.
Me vendim të prokurorit të shtetit, gjashtë të dyshuarit janë dërguar në mbajtje, ndërsa rasti po hetohet më tej nga njësitet kompetente të policisë.
