Në rrugën “Lidhja e Pejës” në Prishtinë, Policia e Kosovës ka intervenuar pas pranimit të një informate për një rrahje.
Sipas raportit 24-orësh të policisë, njësitë policore kanë dalë menjëherë në vendin e ngjarjes, ku kanë hasur dhe kanë shoqëruar tre persona të dyshuar, shtetas të huaj, të cilët dyshohet se ishin përfshirë në një përleshje fizike mes vete.
Pas marrjes së trajtimit mjekësor, të dyshuarit janë intervistuar nga hetuesit policorë lidhur me rastin.
Me rekomandimin e prokurorit, atyre u janë sekuestruar pasaportat për verifikimin e hyrje-daljeve dhe lejeve të qëndrimit në Kosovë, ndërsa më pas janë liruar në procedurë të rregullt.
