Nuk janë të rralla rastet e keqtrajtimit të fëmijëve nga prindërit e tyre.
E një rast i tillë u raportua edhe gjatë kësaj jave në Lipjan.
Policia arrestoi një person nën dyshimin se kishte rrahur dy vajzat e tij të mitura.
Në raportin e Policisë thuhet se viktimat janë intervistuar në prezencë të punëtorit të Qendrës për Punë Sociale.
“Është arrestuar i dyshuari mashkull kosovar nën dyshimin se i njëjti kishte rrahur dy vajzat e tij të mitura. Viktimat janë intervistuar në prezencë të punëtorit të QPS-së, ndërsa i dyshuari pas intervistimit me vendim të prokurorit, është dërguar në mbajtje”, thuhet në raportin e policisë.
Lidhur me rasti, televizioni ka dërguar pyetje në Qendrën për Punë Sociale të kësaj komune.
Por, të njëjtit nuk kanë dhënë informacione se çfarë konkretisht ka ndodhur.
“QPS funksionon për ofrim të shërbimeve sociale, andaj për të gjitha rastet në nevojë, sipas specifikave dhe nevojave ofron shërbime. Duke pas parasysh dinjitetin personal dhe familjarë për rastet e tilla që lokalizojnë vendbanimin dhe inicialet e rastit, QPS e ruan kofidencialitetin dhe nuk merr asnjë përgjegjësi”.
Por se cilat janë arsyet që dërgojnë deri tek keqtrajtimi dhe braktisja e fëmijëve, tregon sociologia Flaka Ymeri.
“Rasti është shumë i dhimbshëm dhe sigurisht don të trajtohet edhe më thellësisht se pse ka ndodh një gjë e tillë, sepse ne e dimë që askush nuk mund t’i mbrojë fëmijët më shumë se sa prindërit e tyre. Mirëpo deri tek braktisja e fëmijëve mund të vijë nga problemet bashkëshortore që mund të vinë nga prindërit e atyre fëmijëve, mirëpo nuk është e drejtë që ata fëmijë të braktisën në rrugë e aq më pak të dhunohen nga prindërit e tyre”, ka deklaruar ajo.
Ymeri ndër të tjera tha se në raste të tilla prindërve duhet t’iu merret e drejta prindërore nga organet kompetente.
