Ambasadori i Gjermanisë në Kosovë, Jorn Rohde, i është kundërpërgjigjur Qeverisë së Kosovës, pasi kjo reagoi ndaj deklaratës së vendeve të QUINT-it, BE-së dhe OSBE-së, që tha se vendimi për shpronësimet në veri ishte i jashtëligjshëm
Por, Rohde ka cituar një raport të juristëve të KiE-së e që sipas tyre vendimi i Qeverisë së Kosovës nuk është në përputhje me sundimin e ligjit.
Ambasadori gjerman, ka thënë se Bashkimi Evropian, OSBE dhe Këshilli i Evropës janë organizata ku Kosova synon anëtarësimin dhe për të ndodhë kjo duhet të marrë parasysh këshillat e tyre.
“BE, OSBE dhe KiE janë organizata që Kosova përpiqen të bëhen anëtare. Për të vazhduar me këtë, do të ndihmonte nëse këshillat tona të përbashkëta me ta do të konsideroheshin. Ne nuk jemi këtu për të ndëshkuar, por për të mbështetur”, ka shkruar ai në X.
After gov’s reaction to Quint/EU/OSCE’s statement on expropriation let me quote from CoE Eminent Lawyers report: „This manner of proceeding is not compatible with the rule of law and likely to further undermine trust between the Serb community and 🇽🇰 government institutions.“ 1/2
— Ambassador Jörn Rohde (@GermanAmbKOS) June 11, 2024
Në reagimin e QUNIT, BE dhe OSBE thuhej se Qeveria ka shkelur ligjet dhe rregulloret e veta për shkak të mangësive procedurale dhe teknike gjatë procesit të shpronësimit.
Në deklaratë po ashtu thuhet se është thelbësore që qeveria të bëjë përpjekje për të siguruar që aktivitetet e shpronësimit të jenë në përputhje me ligjin.
“Ne inkurajojmë qeverinë e Kosovës që t’i përmbahet sundimit të ligjit dhe qeverisjes së mirë, të cilat janë themelet e shoqërive vitale dhe demokratike. Për më tepër, ne i bëjmë thirrje Qeverisë që të riafirmojë përkushtimin e saj ndaj parimeve të Ahtisaarit, duke përfshirë mbrojtjen dhe promovimin e të drejtave të komuniteteve jo-shumicë”, thuhet mes tjerash në deklaratë.
Qeveria e Kosovës i ishte përgjigjur kritikës së vendeve të QUINT-it, Bashkimit Evropian dhe OSBE-së për shpronësimin e tokave në veri të vendit.
Në reagimin e Qeverisë thuhet se deklarata e tyre, konstaton në mënyrë të gabuar gjendjen faktike dhe bën vlerësim ligjor të pabazuar në argumente.
“Qeveria e Republikës së Kosovës shpreh keqardhje për Deklaratën e shteteve të QUINT-it, BE-së dhe OSBE-së lidhur me vendimin e datës 30 maj mbi shpronësimin e pronës së paluajtshme në disa komuna në veri të Republikës së Kosovës. Deklarata në fjalë, konstaton në mënyrë të gabuar gjendjen faktike dhe bën vlerësim ligjor të pabazuar në argument”, thuhet në reagim
