Robin Krasniqi mbrëmë shënoi fitore ndaj Nadjib Muhammed, pasi gjyqtari e diskualifikoi algjerianin.
Pas nëntë raundeve, sipas arbitrit në ring, Ajet Rreci, Mohammedi u diskualifikua për goditje të palejuara në sportin e boksit. Rreci i dha pesë herë vërejtje publike Mohammedit.
Spikeri zyrtar tha se Krasniqi ishte në epërsi me pikë në momentin kur u ndërpre meçi.
E pas duelit ka ardhur edhe reagimi i boksierit junikas.
“Faleminderit populli im, faleminderit Prishtinë, faleminderit Kosovë, për gjithë këtë përkrahje tuajën. Jam shumë i emocionuar dhe i gëzuar, fillimisht nga realizimi i ëndrrës sime për të boksuar para jush, e edhe më me fitoren e sotme timen dhe tuajën gjithashtu. Falënderoj çdo ekip e person të angazhuar në këtë mega projekt timin. I juaji, Robin Krasniqi”, ka shkruar Krasniqi në Facebook.
Mbrëmja e boksit u transmetua live dhe ekskluzivisht nga Tëvë1 dhe Telkos.
