Ministrja e Ekonomisë, Artane Rizvanolli, ka thënë se si ministri nuk kanë informacione zyrtare për arrestimin e drejtorit të Korporatës Energjetike të Kosovës, i cili dyshohet për keqpërdorim të pozitës, ushtrimit të ndikimit dhe konflikit të interesit.
Rizvanolli këto komente i bëri gjatë fjalimit të sotëm në Kuvendin e Kosovës, derisa ka shtuar se presin fakte dhe informacione nga institucionet e drejtësisë.
“Në lidhje me rastin e bastisjes të djeshme, ne si Ministri nuk kemi marrë asnjë informatë zyrtare. Do të presim faktet dhe informacionet nga institucionet e drejtësisë, para se të shprehemi. Dhe gjithashtu do të jemi në kontakt me Bordin në lidhje me zhvillimet atje”, ka thënë Rizvanolli.
Ajo ka thënë se që nga fillimi i mandatit Ministria e Ekonomisë ka dorëzuar mbi 30 raste në Prokurorinë e Kosovës, raporton teve1.info.
“Në rastet e dërguara në Prokurori ju njoftoj se që nga fillim i mandatit Ministria e Ekonomisë dhe Ndërmarrjet Publike kanë dorëzuar mbi 30 raste të ndryshme. Vetëm nga KEK-u gjatë viteve 2021-2022 gjatë mandatit tonë KEK-u ka dorëzuar në Prokurori më shumë se 20 lëndë”, ka thënë ajo.
Ajo ka thënë se pret nga Prokuroria që dyshimet ndaj drejtorit të KEK-ut, të jenë të njëjta edhe për rastet të cilat si ministri i kanë raportuar.
“Në këto 17 raste të dërguara nga Ministria në rastin e KEK-ut nuk është ndërmarrë asnjë hap nga Prokuroria. Uroj që dyshimet ndaj kryeshefit të KEK-ut, Nagip Krasniqi, uroj që eficienca e Prokurorisë në rastin e dyshimeve ndaj Nagip Krasniqit të jetë e njëjtë edhe për rastet tjera të cilat janë raportuar”, ka deklaruar ajo.
Dje, Prokuroria Speciale ka bërë të ditur se është arrestuar Nagip Krasniqi, nën dyshimin se ka kryer veprat penale “Keqpërdorimi i pozitës apo autoritetit zyrtar” , “Ushtrimi i ndikimit” dhe “Konflikti i interesit”.
Gjithashtu, Prokuroria ka bërë të ditur se bastisje përveç në zyrën e Krasniqit janë kryere dhe në banesën e tij, ku edhe janë konfiskuar disa gjëra si prova materiale.
Lidhur me rastin, KEK-u kishte thënë se nuk kanë informacion për qëllimin e aksionit të PK-së. /teve1.info/
