Riola Xhemaili ka nënshkruar kontratë deri në vitin 2028 me skuadrën holandeze, PSV Eindhoven.
Futbollistja e Zvicrës luajti si huazim tek Eindhoveni sezonin e kaluar nga Wolfsburgu i Gjermanisë.
Por ekipi gjerman vendosi ta shesë kartonin e Xhemailit, e cila ishte një nga lojtaret më të mira.
22-vjeçarja luajti të gjitha ndeshjet e sezonit të shkuar, ku shënoi 14 gola dhe asistoi gjashtë herë në 26 paraqitje për PSV-në.
“PSV-ja u bë shpejtë si shtëpi për mua. Kjo për shkak të njerëzve brenda klubit, ambienteve, por edhe për shkak të qytetit dhe vendit. Pas disa muajsh e kuptova se dua të luaj përsëri këtu vitin tjetër”, ka thënë Xhemaili për faqen e klubit holandez.
Xhemaili është përfshirë në ekipin e Zvicrës për Kampionatin Evropian. Zvicra është nikoqire e Evropianit të futbollisteve që mbahet nga 2 deri më 27 korrik.
Vlerësohet si një nga talentet më të mëdha në Zvicër kurse për ekipin e parë të Baselit kishte debutuar si 15-vjeçare.
Pas arritjeve te Baseli dhe Zvicra, Xhemaili bëri hapin e parë të madh në karrierë duke u transferua te Freiburgu dhe pastaj iu bashkua Wolfsburgut.
