Përdorimi i telefonit dhe rrjeteve sociale vazhdon të jetë një trend në rritje.
Por tek të rinjtë, kjo nuk po ndikon gjithmonë pozitivisht.
Sipas psikologes Atifete Syla, pavarësisht se moshat e tjera kanë përjetuar luftën dhe pasojat e saj, rinia mbetet më e prekur nga problemet me shëndetin mendor.
Kjo, pasi rrjetet sociale dhe mënyra se si paraqitet jeta atje po ndikojnë negativisht në psikologjinë e të rinjve.
Po kur duhet prindërit të tregojnë më shumë kujdes?
“Zakonisht kjo varet nga çrregullimi. Ajo që unë rekomandoj është që të kihet shumë kujdes, veçanërisht nëse fëmija fillon të ndryshojë sjellje – çfarëdo qoftë ajo: të izolohet, të shfaqë agresivitet apo çrregullime emocionale”, tha psikologia Atifete Syla.
Do të thotë, çdo ndryshim që nuk ka qenë më parë në gjendjen apo sjelljen e tij është një sinjal për të cilin prindërit duhet të jenë shumë të vëmendshëm.”
Me rastin e shënimit të Ditës Botërore të Shëndetit Mendor, Avokati i Popullit, Naim Qelaj, ka vënë në dukje mungesën e mekanizmave për identifikimin e hershëm të fëmijëve që përballen me sfida të shëndetit mendor.
“Sa i përket fëmijëve, ndërhyrja e hershme është thelbësore. Fillimisht identifikimi dhe diagnostikimi, e më pas marrja e masave të menjëhershme është esenciale për çdo fëmijë që mund të ketë probleme të kësaj natyre”, tha Qelaj.
Dhe, natyrisht, pason trajtimi në rast të identifikimit të këtyre problemeve, përmes mekanizmave që janë më afër qytetarëve.”
Tutje, ai shtoi se pavarësisht sfidave në disa segmente, Kosova qëndron më mirë se disa vende të rajonit, megjithatë vendi është ende larg përmbushjes së standardeve të Bashkimit Evropian.
Kronikë e realizuar nga gazetarja Adea Mustafaj.
