Kandidatja për deputete nga radhët e Partisë Guxo, Albena Reshitaj, ka vlerësuar si të papranueshëm relativizimin nga politikanët shqiptarë të rolit veprues dhe pasojave që, sipas saj, Lista Serbe i ka shkaktuar shtetit dhe institucioneve të Kosovës ndër vite.
Duke folur në emisionin “Info Nata” në Tëvë1, Reshitaj ka thënë se disa individë nga partitë politike shqiptare kanë bërë tolerime dhe bashkëpunime me Listën Serbe, të cilat kanë dëmtuar Kosovën.
Ajo është shprehur e bindur se ata që kanë vepruar në këtë mënyrë sot janë penduar për këto veprime.
“Është e papranueshme që dikush nga politikbërësit tanë ta relativizojë forcën vepruese dhe pasojat që ka bërë Lista Serbe shtetit dhe institucioneve të Kosovës. Unë personalisht nuk e pranoj dhe nuk e respektoj asnjë politikan shqiptar që thotë se Lista Serbe nuk ka ndikim, sepse kjo nuk është e vërtetë. Individë të caktuar nga disa parti politike kanë bërë gabime, tolerime dhe bashkëpunime që i kanë shkaktuar dëm Kosovës dhe besoj se, po të kishin mundësi të ktheheshin pas, nuk do t’i përsërisnin ato”, ka deklaruar ajo.
Reshitaj ka shtuar se Lista Serbe, ndonëse është parti politike, nuk përfaqëson vullnetin e lirë as të qytetarëve shqiptarë e as të atyre serbë.
Sipas saj, problemi kryesor në skenën politike në Kosovë mbetet mungesa e gatishmërisë për të pranuar gabimet dhe për të marrë përgjegjësi.
“Lista Serbe është parti politike, por jo e krijuar nga dëshira dhe vullneti i lirë i qytetarëve, as shqiptarë e as serbë. Problemi ynë qëndron në faktin se nuk pranohet lehtë gabimi dhe faji, ndërsa mungon gatishmëria për të vazhduar punën e përbashkët për të mirën e përgjithshme”, ka theksuar Reshitaj./teve1.info/
