Në prag të mbylljes po rrezikon të jetë Fakulteti i Bujqësisë dhe Veterinës.
Kjo për shkak të mosfunksionalizimit të objektit të ri.
E gjithë kjo situatë, sipas rektorit të Universitetit të Prishtinës “Hasan Prishtina”, Arben Hajrullahu, po vjen si pasojë e uzurpimit të pronës së UP-së nga distributori i energjisë KEDS.
“Që nga 2013 ky objekt nuk funksionalizohet për arsye nga më të ndryshmet. Në këtë objekt janë investuar miliona të taksapaguesve të Kosovës dhe ne jemi në këtë gjendje që nëse nuk arrijmë të bëhet funksional objekti i ri i Fakultetit të Bujqësisë dhe Veterinës, atëherë do të mbyllet fakulteti. Hiq më pak, do të na mbyllet fakulteti; nuk kemi asnjë mundësi t’i akreditojmë programet e fakultetit nëse nuk e kemi objektin. Ne nuk mund t’i zhvillojmë studimet në rrugë apo ara dikund, neve na nevojitet një shtëpi e Fakulteti i Bujqësisë dhe Veterinës nuk ka shtëpi”.
Kërkesë urgjente për largimin e tendave dhe depove nga toka ku është ndërtuar Fakulteti i Bujqësisë dhe Veterinës, rektori i UP-së thotë se e ka bërë që nga 7 korriku.
Largimin e tyre po e kërkojnë me qëllim të zhvendosjes së lartpërçuesit të tensionit të lartë.
Por në rast se kjo nuk ndodh, Hajrullahu paralajmëroi se do ta bllokojnë hyrjen e KEDS-it.
“Nëse nuk ndodh kjo, iu premtoj publikisht që në fillimin e javës që vjen, ne do t’i ndërmarrim të gjithë hapat, se nuk kemi kohë më për të humbur; do t’i ndërmarrim të gjitha hapat që t’i largojmë ato depo ilegale në tokën e UP-së dhe me këtë ta hapim rrugën për funksionalizimin e objektit të ri. Do t’u shkojmë në derë KEDS-it e do t’i pengojmë të hyjnë në shtëpinë e tyre ku e kanë, unë së bashku me profesorë, studentë, këtu ku e kanë zyrën qendrore dhe do t’ua bllokojmë derën”.
Tutje, rektori Arben Hajrullahu u shpreh se pronat e UP-së nuk janë të cenuara vetëm nga KEDS-i, por edhe nga biznese të tjera ndaj të cilave bëri thirrje për largim.
Televizioni ka tentuar të marrë një përgjigje edhe nga KEDS, por të njëjtit nuk kanë kthyer përgjigje deri në publikimin e kronikës.
