Franca, Holanda dhe Belgjika kanë regjistruar rreth 3 mijë e 700 vdekje shtesë gjatë valës së të nxehtit që goditi Evropën në fund të muajit qershor, ndërsa autoritetet paralajmërojnë se këto shifra janë paraprake dhe mund të rriten.
Vala e të nxehtit ishte ndër më të ashprat e regjistruara ndonjëherë në Evropë.
Temperaturat ekstreme shkaktuan ndërprerje në prodhimin e energjisë elektrike, dëmtuan infrastrukturën dhe vunë nën presion të madh sistemet shëndetësore.
Në Francë u regjistruan 2025 vdekje shtesë gjatë kësaj periudhe, me një rritje të ndjeshme të numrit të viktimave mes personave mbi 45 vjeç.
Autoriteti francez i Shëndetit Publik njoftoi se numri i vdekjeve në banesa u rrit me 91% gjatë periudhës 22-28 qershor, krahasuar me javën paraardhëse.
Gjithashtu u shënua rritje e vdekjeve edhe në shtëpitë e kujdesit për të moshuarit dhe në institucionet shëndetësore.
Në Belgjikë, Ministria e Shëndetësisë regjistroi rreth 1200 vdekje shtesë.
Prej tyre, 530 ishin persona të moshës 85 vjeç e lart, ndërsa 180 viktima ishin nën moshën 65 vjeç.
Ndërkohë, autoritetet në Holandë njoftuan se vala e të nxehtit shkaktoi rreth 480 vdekje shtesë, kryesisht mes personave mbi 80 vjeç.
Ekspertët theksojnë se kjo valë ka qenë me siguri pasojë e ndryshimeve klimatike.
