Real Madridi ka bërë edhe një hap prapa në luftën për titullin e kampionit në La Liga të Spanjës.
Të dielën mbrëma, në stadiumin “Santiago Bernabeu”, Real Madridi u mposht nga skuadra e Celta Vigos.
Ndeshja e xhiros së 16-të në kampionatin spanjoll, përfundoi me rezultatin 2:0 në favor të Celtas.
Goat në këtë përballje, u shënoi Williot Zwedberg, ku golin e parë e realizoi në minutën e 53-të pas asistimit të Bryan Zaragozas kurse të dytin në minutën e tretë të kohës shtesë për ta vulosur fitoren e Celtas. Te goli i dyti asistoi Iago Aspas, duke i mundësuar Zwedbergut që ta kalojë edhe portierin Thibaut Courtois për të shënuar nga afërsia në portën e zbrazët.
Vlen të theksohet se Real Madridi ndeshjen e mbylli me një lojtar më pak pasi në minutën e 64-të, mbrojtësi Fran Garcia u ndëshkua me kartonin e dytë të verdhë brenda një minute dhe u detyrua të largohet nga fusha e lojës.
Në fakt, Realit iu përjashtua nga loja edhe mbrojtësi Alvaro Carreras që u ndëshkua brenda pak sekondave me dy kartonë të verdhë për ta përjashtuar me të kuqin.
Kështu që, Reali ndeshjen e përfundoi me dy futbollistë më pak në fushë.
Me këtë fitore, Celta ngrihet në pozitën e dhjetë në tabelë me 19 pikë kurse Real Madridi mbetet I dyti me 36 pikë, katër më pak se Barcelona që është lidere.
Për Realin, kjo është humbja e dytë këtë sezon, në të cilin ka edhe 3 barazime e 11 fitore.
