Real Madrid ka fituar me rezultat 4-2 ndaj Napolit në kuadër të xhiros së pestë në Ligën e Kampionëve në “Santiago Bernabeu.
Mysafirët kaluan të parët në avantazh me anë të Giovanni Simeones i cili shënoi në minutën e nëntë për t’i dhënë avantazhin prej 1-0 Napolit.
Real Madridi reagoi menjëherë dhe që në aksionin e radhës arritën të barazojnë shifrat në 1-1 me anë të Rodrygos, i cili në minutën e 11-të bëri një goditje të jashtëzakonshme e cila përfundoi në cepin e portës së Meret.
Madrilenët rikthyen rezultatin dhe morën epërsinë në minutën e 22-të, ku një harkim perfekt të David Alabas e shfrytëzoi për mrekulli Jude Bellingham që me kokë arriti të mposht lehtësisht portierin mysafir.
Deri në përfundim të pjesës së parë, madrilenët patën edhe një mundësi me Brahim Diaz për të shënuar golin e tretë por që topi përfundoi jashtë portës.
Me epërsi minimale të Real Madridit përfundoi 45 minutëshi i parë i takimit
Napoli barazoi shifrat në minutën e 47-të ku autor i golit ishte Frank Anguissa.
Joselu humbi një mundësi të artë shënimi në minutën e 61-të për t’i dhënë epërsinë madrilenëve.
Sulmuesi spanjoll pati edhe një mundësi tjetër në minutën e 78-të por përsëri nuk arriti të gjejë dot rrugën e rrjetës.
Madrilenët gjetën golin e tretë në minutën e 83-të përmes talentit nga akademia Nico Paz i cili nga një distancë e largët arriti të mposht portierin Alex Meret.
Goli i cili fundosi përfundimisht Napolin erdhi në minutën e 94-të, ku pas shumë tentimeve Joselu arriti të shënojë për rezultatin 4-2.
Deri në fishkëllimën e fundit nuk pati më gola dhe Real Madridi mori fitoren e cila i siguron atyre kualifikimin si lider I grupit.
