Kryeministri Albin Kurti ka reaguar pas kidnapimit të tre zyrtarëve policorë të Kosovës nga forcat speciale serbe në Leposaviq.
Kurti thotë se dyshohet që policët janë rrëmbyer nga ushtria e Serbisë si shenjë hakmarrje.
“Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës”, ka shkruar Kurti.
Kurti ka thënë se hyrja e forcave të Serbisë në territorin e Kosovës është agresion dhe synim për eskalim dhe destabilizim.
“Kërkojmë lirimin e menjëhershëm të tre zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë”, ka shkruar lideri i ekzekutivit.
