Gjatë procesit gjyqësor që nisi sot në Hagë ndaj Thaçit dhe të tjerëve, është përmendur edhe komunikata numër 59.
Kryetari I hetuesve në ZPS, Ward Ferdinandusse tha sot se ndër komunikatat më të përfolura ishte Komunikata nr.59, që dënonte “një linjë kolaboracionistësh”, e që bëhej fjalë për ish-luftëtarin Gani Geci.
“Thaçi e kishte pranuar se Shtabi komunikonte me komunikata. Komunikata 59 akuzoi një linjë e donin që ky person të bëhej objekt keqtrajtimi, në mos vdekjeje. Thaçi pretendonte se kjo komunikatë s’ishte lëshuar nga Shtabi, po nga individë keqdashës”, deklaroi ai.
Zyrtari i ZPS-së lëshoi edhe deklarimin e të akuzuarit tjetër, Rexhep Selimi, ku kishte deklaruar se komunikata nr.59 ishte shkruar nga Thaçi e po ashtu përmendi deklarimin e Thaçit se kjo komunikatë ishte lëshuar “nga banhofat”.
Lidhur me këtë ka reaguar edhe familja Geci.
Kjo familje pretendon se kjo komunikatë është shkruar nga Hashim Thaçi kundër Gani Gecit “për të na vrarë e për të na sharë vëllaun tonë dhe familjen tone”.
Teksa pretendojnë se Krasniqi e Selimi kanë të drejtë.
“Unë Fadil Geci, në emër të familjes sime kam shkuar në shtëpinë e Hashim Thaçit dhe e kam takuar babain e Hashim Thaçit dhe vëllaun e madh Gani Thaçin, i kam kërkuar sqarime për Komunikatën nr.59, i kam thënë: Haxhi, djalin e ki drejtor të drejtorisë politike, po mundoheni me ba njëjtë si Fadil Hoxha e Ali Shukria në vitin 1945, jam ardh në shtëpinë tënde lajmëroje djalin tënd se për Komunikatën nr.59 herët a vonë do mbash përgjegjësi”, thuhet në reagim.
Po ashtu Fadil Geci ka shkruar se është intervistuar nga Specialja për këtë komunikatë.
