Gjykata Themelore në Prishtinë ka shpallur vendimin për rastin e njohur si ‘Veteranët’.
10 nga 12 të akuzuarit janë shpallur fajtorë dhe janë dënuar me nga një vit burgim secili, ndërsa dy prej tyre janë liruar për shkak të mosprovimit të fajësisë.
Agim Çeku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Fadil Shurdhaj dhe Xhavit Jashari janë të dënuarit, kurse Nuredin Lushtaku dhe Smajl Elezaj të liruarit.
Ata akuzoheshin se, si anëtarë të Komisionit Qeveritar për Njohjen dhe Verifikimin e Statusit të Veteranëve të Ushtrisë Çlirimtare të Kosovës, kanë vepruar në kundërshtim me ligjin dhe me rregullat e përcaktuara nga vetë Komisioni – duke ua mundësuar dhe njohur personave të tjerë statusin e veteranit të UÇK-së, me qëllim që ata të përfitojnë në mënyrë të kundërligjshme.
Ndryshe, Gjykata Themelore në Prishtinë, më 16 prill 2021 të akuzuarit i kishte liruar nga akuza. Por, Gjykata e Apelit më 26 prill 2022 e ka kthyer në rigjykim këtë rast.
“Departamenti Special i Gjykatës së Apelit të Kosovës, pas shqyrtimit të të gjitha shkresave të lëndës dhe vlerësimit të pretendimeve ankimore, ka vendosur që ta aprovoj ankesën e Prokurorisë Speciale të Kosovës, ndërsa ta anuloj aktgjykimin e Gjykatës Themelore në Prishtinë, PKR.nr.230/2018, i datës 16 prill 2021 dhe kjo çështje penale do t’i kthehet në rigjykim dhe rivendosje të njejtës gjykatë“, thuhej në komunikatë.
