Fillimisht tha se për hatër të tij, kryeministri Albin Kurti mori vendim që manastirit të Deçanit t’ia kaloj në pronësi 24 hektarë tokë.
Por, vetëm pak kohë më pas, ministri për Komunitete dhe Kthim, Nenad Rashiq, doli dhe e demantoi veten.
Rashiq thotë se pa ndonjë qëllim, ka ngatërruar fjalët që Kurti ia kishte thënë për një ngjarje tjetër, e jo për Manastirin e Deçanit.
“Unë vet e kam bë një ngatërrim, prej një ngjarje në ngjarje tjetër. Megjithatë nuk konsideroj se ka qenë një gabim kaq paradoksal sikurse është bërë në rrjete sociale, me thënë të vërtetën, kërkoj falje për shprehjen, pak banalizohet. Sepse konsideroj se nuk është një gabim i qëllimshëm ose ndonjë veprim i cili shkon kundër interesave strategjike të Kosovës”, tha Rashiq.
Rashiq tash thotë se me insistimin e tij ndaj Kurtit, Patriarkut Porfirije iu mundësua një vizitë në Kosovë, për Krishtlindjet ortodokse të vitit 2023.
“Kjo ka ndodhë në fillim të 2023-tës, ku patriaku kërkoi një vizitë në Kosovë dhe unë kërkova prej kryeministrit, a është e mundshme t’ia mundësojmë një gjë të tillë dhe ajo ka ndodhë në atë formë, ku i kemi mundësuar vizitën e patriakut. Dhe fjalët e tilla që janë përdorur janë të vërteta, se kanë qenë për rastin e vizitës së patriakut. Unë e kuptoj se gabime mund të ndodhin, po më vjen keq që keni hyrë në konfuzion. Përndryshe, nuk ka pasë ndonjë qëllim qoftë politik qoftë individual”, u shpreh ministri për Komunitete dhe Kthim.
Megjithatë, Rashiq e pranon se çështja e manastirit të Deçanit, ka qenë shpeshherë temë e diskutimeve të tij me kryeministrin Kurti.
“Nuk mund të jem i sigurt sa herë, por jam i sigurt që shumë herë kemi përmend, në veçanti unë këtë tematikë. Jo vetëm me kryeministrin, por siç thashtë me të gjithë përfaqësuesit diplomatik”, tha Rashiq për Tëvë1.
Pas një procesi gjyqësor 16 vjeçar, në lidhje me pronësinë e 24 hektarë tokë e pyje, Gjykata Kushtetuese, vendosi në vitin 2016 që pronësia i takon Manastirit të Deçanit.
Më 13 mars të vitit 2024, Qeveria e Kosovës urdhëroi Agjencinë Kadastrale të Kosovës, t’ia njehë pronësinë Manastirit të Deçanit për 24 hektarët tokë.
E gjithë kjo, sipas Qeverisë u bë në kuadër të plotësimit të kushteve për pranimin e Kosovës në Këshillin e Evropës.
