Sami Lushtaku do të paraqitet në Stacionin Policor në Skenderaj për t’u intervistuar lidhur me incidentin e ndodhur një ditë më parë me kryetarin e degës së Lëvizjes Vetëvendosje në Skenderaj, Hysni Mehani, i cili ka pretenduar se është sulmuar fizikisht nga Lushtaku.
Lajmin për paraqitjen e Lushtakut në polici e kanë bërë të ditur mediat lokale në Skenderaj.
Pas incidentit në një lokal të qytetit, ku mbetën të lënduar Mehani dhe një aktivist tjetër i Vetëvendosjes, Lushtaku reagoi përmes një postimi në Facebook duke mohuar se e ka sulmuar fizikisht Mehanin.
Ai tha se reagimi kishte ardhur nga qytetarët pasi, sipas tij, Mehani i ishte drejtuar me fjalët “Sami Serbia”.
Ndërkohë, Policia e Kosovës ka arrestuar dy persona lidhur me rastin, ndërsa Prokuroria Themelore në Mitrovicë kishte njoftuar se Lushtaku dhe një person tjetër ishin ftuar për intervistim, por nuk i ishin përgjigjur ftesës deri në momentin e publikimit të njoftimit.
Këtë deklarim e kishte mohuar më pas nënkryetari i Komunës së Skenderajt, Fadil Nura, i cili tha se deri paraditen e sotme Lushtaku nuk kishte pranuar ndonjë ftesë zyrtare nga prokuroria.
“Nëse ftesa do t’i shkonte, ai do t’i përgjigjej”, kishte deklaruar Nura në një konferencë për media.
Ndërkohë, shefi i asamblistëve të Partia Demokratike e Kosovës në Skenderaj, Alban Berisha, ka ftuar qytetarët që të mblidhen para Stacionit Policor në Skenderaj gjatë kohës sa pritet të zhvillohet intervistimi i Lushtakut.
“Brenda pak minutash pritet të zhvillohet intervista, prandaj ftoj sa më shumë qytetarë të mblidhemi për ta pritur Kryetarin Gjeneral Sami Lushtaku deri në përfundim të saj”, ka shkruar Berisha në Facebook.
Ai ka akuzuar Policinë për “keqpërdorim të Njësisë Speciale”, duke thënë se prania e tyre me maska dhe armë të gjata ka krijuar tension dhe frikë te qytetarët.
“Këto veprime po e rikujtojnë kohën kur policia përdorej për presion politik e jo për drejtësi. Mos të mendojë askush se mund të na frikësojë me skena force e demonstrim pushteti”, ka shkruar ai.
