Mediat në Serbi raportojnë se janë vjedhur zyrat e UNMIK-ut në ndërtesat komunale në Zubin Potok dhe Leposaviq.
Raportohet se brenda zyrave janë vjedhur mobilet e zyrës, frigorifer e gjëra të tjera.
Ndërkohë lidhur me këto raportime për teve1.info, zëvendësdrejtori rajonal për veriun e Kosovës, Veton Eshani, tha se Policia e Kosovës ka informacione që zyrat e UNMIK-ut janë thyer në muajin maj.
“Ato zyra janë dëmtuar në muajin maj të këtij viti. Nuk kemi informacione se a është vjedhur diçka më herët”.
Ndërkohë, mediumi serb “Kosovo Online” raporton se zyrtarët e UNMIK-ut shkuan të hënën për t’i vizituar zyrat dhe se Misioni i Përkohshëm i Kombeve të Bashkuara në Kosovë ka konfirmuar vjedhjen.
“Qasja e UNMIK-ut në zyrat e vendosura në ndërtesat komunale në Zubin Potok, Zveçan dhe Leposaviq është kufizuar që nga incidentet në maj të vitit 2023. UNMIK-u ka vizituar zyrat e tij në disa raste për të rimarrë disa nga pronat e tij dhe për të vlerësuar objektet me mbështetjen e KFOR-it dhe në koordinim me autoritetet e Kosovës. UNMIK-u ua shprehu shqetësimin autoriteteve të Kosovës për hyrjen e paautorizuar në objektet e tij dhe përkujtoi se objektet dhe prona e Kombeve të Bashkuara janë të pacenueshme dhe se qasja në ato objekte duhet të mbrohet dhe garantohet gjatë gjithë kohës”, citohet t’i kenë thënë nga UNMIK-u këtij mediumi./teve1.info/
