Kryetari i komunës së Prishtinës, Përparim Rama ka thënë se është thellësisht i shqetësuar pasi sipas tij, Ministria e Financave po bllokon bartjen e të hyrave vetanake të komunave nga vitet paraprake.
Rama ka deklaruar se ka kërkuar me shkrim nga kryetari i Kuvendit, kryeministri dhe ministry i Financave që mjetet e mbledhura nga taksat e qytetarëve të Kryeqytetit, t’i kthehen Prishtinës ashtu siç i takojnë.
“Janë 28.8 milion Euro të parapara për 172 projekte kapitale të Kryeqytetit për këtë vit të cilat Qeveria po ua bllokon qytetarëve të Prishtinës. Rrugë, shkolla, çerdhe, biblioteka, ujësjellës, parqe e të tjera do të mbesin pa u ndërtuar si pasojë e kësaj bllokade”, ka shkruar Rama.
Nëse këto mjete nuk barten menjëherë, ka paralajmëruar se do t’i drejtohet Kushtetuese.
“Nëse këto mjete nuk barten menjëherë, do të konsiderojmë se ky është një veprim i qëllimshëm i Qeverisë për të bllokuar zhvillimin e Kryeqytetit. Prandaj, si palë e autorizuar, ne do të detyrohemi t’i drejtohemi Gjykatës Kushtetuese në mbrojtje të të drejtave të qytetarëve të Prishtinës”, ka shkruar Rama.
