Kryetari i Kamenicës, Kadri Rahimaj, thotë se kur ka ardhur në pushtet këtë komunë nuk e ka gjetur në gjendje të mirë.
Rahimaj thotë se kanë trashëguar borxh nga qeverisja e kaluar, dhe kjo sipas tij tregon paaftësi për menaxhim.
“Jo mirë, për faktin që një buxhet i vogël prej 1.3 milion eurosh në investime kapitale të mos menaxhohet mirë dhe drejt, e të trashëgojmë borxh për vitin 2022, kemi trashëguar një borxh mbi 500 mijë eurosh, tregon një paaftësi për menaxhimin”, tha ai në emisionin “Info Nata” në Tëvë1.
Kryetari i Kamneicës që vjen nga radhët e Lëvizjes Vetëvendosje thotë se kjo komunë nga vendi i 22-të tashmë radhitet në vendin e tretë sa i përket transparencës komunale.
“Komuna e Kamenicës ka qenë në vendin e 22-të për transparencë komunale, qytetarët nuk kanë pasur qasje në dokumentet zyrtare ka qenë një qeverisje e mbyllur, prandaj kanë pasur hamendësime për votën që është dhënë ndaj tyre. Ndërsa, sot Komuna e Kamenicës është në vendin e tretë sa i përket transparencës komunale. Jemi komuna e parë që kemi formuar forumin për transparencë dhe synojmë që transparencën ta fuqizojmë edhe më tutje, qoftë me iniciativa tona, qoftë edhe me organizata të tilla që janë të thirrura për bashkëpunime”, tha i pari i komunës.
Komuna e Kamenicës më parë është qeverisur nga ish-bashkëpartiaku i tij, Qëndron Kastrati, i cili tashmë është pjesë e Partisë Socialdemokrate./teve1.info/
